GĦAJNUNA | ENGLISH VERSION    

Introduzzjoni

Il-Kawżi Ċivili fuq l-Internet huwa servizz ieħor ta' l-eGovernment li qed joffri l-Ministeru għall-Ġustizzja u Gvern Lokali biex dejjem aktar klijenti jgawdu mill-benefiċċji tat-teknoloġija ta' l-informatika u l-kommunikazzjoni.

Il-Kawżi Ċivili fuq l-Internet, huma għodda qawwija ta' tiftix elettroniku maħsuba biex jaqdu lill-Ġudikant, avukati, nutara, impjegati tal-Qorti, studenti tal-liġi, ġurnalisti u lill-pubbliku. Is-servizz hu b'xejn u mingħajr limitu ta' użu.

Is-servizz tal-Kawżi Ċivili jinkorpora sitt servizzi:

• Kawżi Introdotti
• Kawżi Pendenti
• Kawżi Magħluqa fl-Aħħar Sena
• Lista tan-Noticeboard
• Tfittxija għas-Seduta
• Differimenti

Is-servizz tal-Kawżi Ċivili fuq l-Internet huwa miftuħ erbgħa u għoxrin siegħa kuljum, sebat ijiem fil-ġimgħa u l-informazzjoni tista' tigi aċċessata minn kull fejn hemm aċċess għall-Internet f`Malta u Għawdex u barra minnhom.

Il-ġabra ta' Kawżi Ċivili miżmuma f'dan is-sit huma:

• l-kawżi introdotti (ġodda);
• l-kawżi pendenti;
• l-kawżi magħluqa f'din l-aħħar sena.

Kawżi Introdotti

Kawża ċivili ġdida tiġi rreġistrata f'waħda mir-Reġistri tal-Qrati Ċivili ta' Malta jew ta' Għawdex minn rappreżentat legali (jista' jkun avukat jew prokuratur legali) jew minn wieħed mill-partijiet (f'każ tat-Tribunal għal Talbiet Żgħar). Minn hemm hekk il-kawża tgħaddi minn proċess fejn tiġi assenjati lil Ġudikant li jieħu ħsieb jappuntha għall-Ewwel Seduta.

Dan is-servizz hu proprju l-ġabra ta' dawn il-kawżi ġodda li ġew introdotti fil-Qrati Ċivili ta' Malta u ta' Għawdex, li:

• għadhom ma ġewx allokati smigħ ta' seduta; jew
• ngħataw l-ewwel smigħ ta' seduta (L-Ewwel Dehra) biss.

Dan is-servizz huwa għodda ta' tfittix utli għall-avukati, prokuraturi legali u għall-pubbliku in ġenerali, li jippreżentaw kawża quddiem il-Qrati Ċivili, u jkunu jridu jafu quddiem liema Ġudikant ser tinstema' l-kawża tagħhom u f'liema ġurnata.

Kawżi Pendenti

Dan is-servizz jinkludi dawk il-kawżi kollha li jidhru pendenti quddiem il-Qrati Ċivili ta' Malta jew ta' Għawdex, jiġifieri dawk il-kawżi kollha li għandhom iktar minn seduta waħda u li mhumiex magħluqa sal-ġurnata tal-llum.

Barra dettalji relatati mal-każ, bħal Riferenza tal-każ, Qorti u Ġudikatura, wieħed jista' jara wkoll informazzjoni fuq il-partijiet involuti w l-lista tas-seduti abbinati mal-każ partikolari. Mil-lista tas-seduti wieħed għandu l-faċilita' addizzjonali li jaċċessa l-verbali tas-seduta magħżula.

Importanti li wieħed ikun jaf li l-Verbali murija fis-sit tal-Kawżi Ċivili huma dawk li qegħdin abbinati mas-seduti li seħħew wara l-aħħar ta' Ġunju tas-sena 2002 'il quddiem. Barra minn hekk, verbal ikun disponnibli biss jekk min-naħa tal-Qorti ikun maħdum u magħluq.

Kawżi Magħluqa fl-Aħħar Sena

Dan is-servizz itik il-facilita' li tfittex fuq il-kawżi kollha li ngħalqu f'din l-aħħar sena, jiġifieri għandhom Data ta' Terminazzjoni. Wieħed jista' jara l-istess dettalji bħal dawk offruti fis-servizz tal-Kawżi Pendenti, deskritti fis-sezzjoni ta' qabel din. Barra minn hekk, f'dan l-istadju finali tal-kawża wieħed jista' jara wkoll dettalji bħal:

• l-intaxxar (f'każ li l-kawża hi taxxabli u t-taxxa hi maħduma min-naħa tal-Qorti); u
• jekk kawża ġietx appellata jew le.

Lista tan-Noticeboard

Qabel ma tinstema' s-seduta tal-ġurnata, għal kull awla jkun hemm l-lista tal-kawżi li ser jinstemgħu f'dik il-ġurnata mwaħħla fuq in-Noticeboard għall-informazzjoni tal-pubbliku in ġenerali.

Is-servizz itik l-opportunita' li tfittex l-istess lista li titwaħħal man-Noticeboard.

Tfittxija għas-Seduta

Jekk int avukat jew rappreżentat legali, din hija għodda utli ħafna biex tkun taf x'seduti għandek fil-ġurnata. L-istess servizz itik faċilita' li tara l-lista tas-seduti għal kull każ ċivili li jidher fis-sit.

Minn din il-lista, wieħed jista' jaċċessa wkoll il-verbali. Jekk trid tkun taf liema verbali jidhru fis-sit, jekk jogħġbok irreferi għat-taqsima "Kawżi Pendenti" f'dan l-istess file ta' l-Għajnuna.

Differimenti

Kawża, għal xi raġuni jew oħra, tista' tiġi differita għal ġurnata oħra fil-futur. Dan is-servizz ġie mibni bil-ħsieb li jimminimizza kull inkonvenjenza li d-differiment jista' joħloq kemm lill-pubbliku in ġenerali, kif ukoll lir-rappreżentanti legali.

Billi tagħżel il-ġurnata li tixtieq, is-sit jurik jekk kien hemm xi seduti li ġew differiti. B'dan il-mod wieħed ikun jaf jekk il-kawża ser tinstema' fil-ġurnata ffissata.

Ikkuntattja l-Esperti

Tista' ukoll tibgħat kummenti u suġġerimenti billi tuża l-faċilita' offruta permezz tal-paġna "Ikkuntattja l-Esperti".

GĦAJNUNA | ENGLISH VERSION